លោកជំទាវ ចឹក ហេង អញ្ជើញចុះជួបសំណេះសំណាលជាមួយក្រុមប្រឹក្សាឃុំកោះពាក្យ ឃុំកោះប៉ង ឃុំកាចូន ស្មៀន និងនាយប៉ុស្តិ៍នគរបាល នៃស្រុកវើនសៃ ខេត្តរតនគិរី
នាព្រឹកថ្ងៃព្រហស្បតិ៍ ១កើត ខែចេត្រ ឆ្នាំម្សាញ់ សប្តស័ក ព.ស.២៥៦៩ ត្រូវថ្ងៃទី១៩ ខែមីនា ឆ្នាំ២០២៦ ស្ថិតនៅសាលាឃុំកោះពាក្យ នៃស្រុកវើនសៃ លោកជំទាវ ចឹក ហេង សមាជិកាក្រុមសមាជិកព្រឹទ្ធសភាប្រចាំភូមិភាគទី៨ និងជាសមាជិកគណៈកម្មការទី៤ព្រឹទ្ធសភា អមដំណើរដោយ លោក វ៉ាន់ សោភា អភិបាលរង នៃគណៈអភិបាលខេត្ត និងលោក ណក រ៉ុម អភិបាលរង នៃគណៈអភិបាលស្រុកវើនសៃ បានអញ្ជើញចុះជួបសួរសុខទុក្ខសំណេះសំណាល និងនាំនូវប្រសាសន៍សួរសុខទុក្ខពីសំណាក់ថ្នាក់ដឹកនាំព្រឹទ្ធសភាទៅដល់ក្រុមប្រឹក្សាឃុំកោះពាក្យ ឃុំកោះប៉ង់ ឃុំកាចូន ស្មៀន និងនាយប៉ុស្តិ៍នគរបាល នៃស្រុកវើនសៃ ខេត្តរតនគិរី។
នាឱកាសនោះ លោកជំទាវ បានលើកឡើងអំពីការចុះមកនេះ គឺចង់ផ្សារភ្ជាប់ឱ្យកាន់តែជិតស្និតជាមួយអង្គបោះឆ្នោត ព្រមទាំងស្វែងយល់ពីបញ្ហាប្រឈម និងសំណូមពរតាមមូលដ្ឋាន។លោកជំទាវបានកោតសសើរនូវសមិទ្ធផលការងារសំខាន់ៗនាពេលកន្លងមករបស់ក្រុមប្រឹក្សាឃុំទាំងបី។
ឆ្លៀតក្នុងឱកាសនោះ លោកជំទាវ បានសំណូមពរឱ្យក្រុមប្រឹក្សាឃុំ ស្មៀន និងនាយប៉ុស្ដិ៍នគរបាល ខិតខំលើកកម្ពស់អនុវត្តន៍ការផ្តល់សេវាសាធារណៈឱ្យកាន់តែល្អ ជាពិសេសផ្តល់សេវាសង្គម ដែលជាតម្រូវការរបស់ប្រជាជន ដែលមានជីវភាពទន់ខ្សោយ និងងាយរងគ្រោះ ក្នុងមូលដ្ឋាន និងសូមសមាជិកក្រុមប្រឹក្សាឃុំ ស្មៀន និងនាយប៉ុស្ដិ៍នគរបាល ត្រូវបន្តរក្សាសាមគ្គីភាព ដើម្បីផ្ដល់សេវាសាធារណៈ និងការអនុវត្តនៅមូលដ្ឋានឱ្យកាន់តែប្រសើរជាងមុន។
នាឱកាសនោះដែរ លោកជំទាវបានជូនបំពង់ទឹក និងថវិកាមួយចំនួនដល់ក្រុមប្រឹក្សាឃុំ ស្មៀន និងនាយប៉ុស្ដិ៍នគរបាល។
ប្រភព៖ ការិយាល័យអមក្រុមសមាជិកព្រឹទ្ធសភាប្រចាំភូមិភាគទី៨
សម្រួលខ្លឹមសារ៖ នាយកដ្ឋានព័ត៌មាន
